اورمو گؤلو آی-گونشین باتماسین

دونیانین هر طرفینی هاي-کوي بوروموش. مئدیاداکی خبرلرده هر طرفده گونده بیر فلاکت یا سئوینج خبري یاییملانیر. بیر طرفده داشقین، بیر طرفده باسقین. بیر طرفده ده آوروپا لیگاسینین یاریشلاري...

وطنداشلاریمیزین چوخو دونیانین ان اؤنده گئدن سیاسی، ایجتیماعی، فلسفی،ایدمان... سورونلارینی لاپ بئله اورادا، او چئوره ده یاشایانلاردان دا یاخشی ایزله  ییرلر.  بیریسی یئنیجه نوبئل ادبیات موکافاتینی قازانمیش، هئرتا موللئرله ماراقلا نیر،

بیریسی دئیوید بئکامین کؤینه یینین نئچه دوللارا ساتیشی ایله و کیمی لري دونیانین چئشیدلی یئرلرینده تهلوکه لی طبیعی فلاکتلرله. آوروپادا کی مئشه یانغینلاري ایله، «اوزون» لایه سینین آرادان گئتمه سی ایله... و آزدا دئییل یئر کوره  سینده باش وئرن بو طبیعی فلاکتلر. همده چوخ اوزاقدا دا دئییل.

باخین!  بو اولایلارلا ایلگی لنَن یئرلی وطنداشلاریمیزدان، داها کیچیک میقیاسدا شهرداشلاریمیزدان،گلین«بس بورادا، سیزین چئوره نیزده  نه لر باش وئریر؟» سوروشاق.

بورادا–اورمو شهریندن  40-35کیلومئتیر جنوبا گئتدیکده- ائله بو فلاکتلرین بیزیم یاشامیندا داها ائتگیلی اولانی باش وئرمیرمی؟ و ائله بو یاشادیغیمیز، بوي آتدیغیمیز شهریمیز، اؤزل گؤزللییینی بورادان آلمیرمی؟

اورمو شهریندن جنوبا دوغروآددیملاییریق. هر نه دن اؤنجه سرین کولک اسیمی یاناقلاریمیزي قیزارداراق، تاریخ قاتلاریندان باش قالدیریب، قهرمان آتا-آنالاریمیزین چئوره سینده یورد سالدیغی، قوجامان بیر گؤله یاخینلاشدیغیمیزي موشتولوقلایاجاق.

آنجاق یئتیشدیکده گؤزلرین شاشیراجاقدیر، سن بیر اورمولو اولسان و نئچه ایللر اؤنجه گؤلون بؤیوکلویونو، دالغالارینین گوجونو گؤرموشموش سنسه، او زامان طبیعتین ده اؤلومونه داها آرتیق ایناناجاقسان. اورمولو اولماسانسا اوندا گؤلون چئوره سینی بوروموش دهشتلی دوزلاق سنه آغیر و آجیناجاقلی گله جکدن آیدینجا دانیشاجاق.

هه بو همن دادلی-دوزلو شور گؤلدور. مشروطه نی خاطیرلادان کاظیم خان داشی ایله بئله و یابانجیلارا عوصیان قالدیران عوثمان یومروغو ایله یئنه ده دایانیب و آددیم- آددیم اؤلومه یاخینلاشیر.

آدلیم، قازاخیستانلی تورك یازاري، «چینگیز آیتماتوف»، «گون وار عصره برابر»رومانیندا، «آرال گؤلو قورویان گونده، اینسانلیق کؤکونون قوروماسینا اینانیرام»دئمیش.

نئجه ده یئرلی دیر منجه بو سؤزو «اورمو گؤلو قورویان گونده، اینسانلیق گولونون سولدوغونو دوشونورم» دئیه تکرارلایاق. ان آزي اورمو گؤلو بیزیم اوچون عادیجه بیر گؤل دئییل.

آذربایجانین قوجامان شاعیری دده کاتیب دئدییی کیمی:

اورمو گؤلو سن اورمونون گولوسن

سن اورمو یوخ آذربایجان گولوسن

بولبولوسن، چیچه یی سن، گولوسن

او گوللردن بیر دسته وئر اییله یک

باخاق گؤرک گله جه یی نئیله یک

اورمو گؤلو یاتماییبسان اویاقسان

بویا گؤتورمزسن اؤزون بویاقسان

آذربایجان تاریخینه دایاقسان

سن دایاق اول آللاه سنین دایاغین

دونیا بویو  بودره مه سین آیاغین

اورموگؤلو قدیم تورك خالقینین دانیلماز تاریخ سندي، بابالاریمیزین قوووشدوغو یئردیر.

چئوره سینده کئچمیشیمیزي و گله جه ییمیزي بوروموش. بیر طرفی ایسه حسنلی تپه سینی باغرینا باسان سولدوز، بیر طرفی آزادلیق دؤیوشچوسو قوجامان تبریز و قوزئییه گلدیکده صفی الدینین سازي ایله دونیایا قارداشلیق نغمه سینی پایلایان جنت اورمو شهریمیز(اور=شهر، مو= جنت، سومئرجه).

 اورمو گؤلو بوتون کئچمیشلریمیزده یاشایان اورارتو، آراتتا، ماننا، قوتتی، لولوبی، آتالاریمیزین یاشاملارینین، بوسبوتون آذربایجان کیملییینین شاهیدي کیمی یاشامالیدیر. ایندیسه بیر زامان بیزه یاشام باغیشلایان شور گؤله بورجوموزو اؤده مک واختی دیر.

اورمو گؤلو آی-گونشین باتماسین

یار-یولداشین،ائلین، سنی آتماسین

زامان بیزیم باشیمیزی قاتماسین

قوی بیزیم ده بیر آیینسین باشیمیز

خایین لارین باشینادیر داشیمیز

اورمو درگیسی‌نین 2- نجی سایینین اؤن سؤزو

آذر-88